उपजीविका

महाराष्ट्राचा मोठा भाग निमशुष्क असून तेथे पावसाची अनिश्चितता नेहमीची आहे — कधी कमी, कधी जास्त, एका वर्षी पूर तर पुढच्या वर्षी दुष्काळ. अल्पभूधारक शेतकरी, एकल महिला शेतकरी व भूमिहीन कुटुंबांना याचा फटका सर्वात आधी पीक, पशुधन व उत्पन्नात बसतो.

डीएसटी लहान स्वयंसेवी संस्थांमध्ये हवामान-अनुकूल शेती व पूरक उपजीविका उपक्रमांची समज वाढवते आणि हे ज्ञान त्यांच्या भागातील शेतकऱ्यांपर्यंत पोहोचवण्यास मदत करते. जावळी (सातारा) येथील श्रमिक जनता विकास संस्थेसारख्या सहयोगी संस्थांसोबत डीएसटी पारंपरिक व सेंद्रिय शेतीवर शेतकरी कार्यशाळा घेते, देशी बियाण्यांचे वाटप करते, आणि महिला बचत गट व त्यांच्या महासंघांसोबत आर्थिक नियोजन व साक्षरतेवर दीर्घकाळ काम करत आली आहे.